A parlamentaria do BNG, Ana Pontón mostrou o seu malestar por non recibir, con antelación, o documento presentado hoxe polo Secretario Xeral de Política Lingüística e denunciou que o descoñecemento previo do Plan, furtou o debate dos grupos parlamentarios na comparecencia de Valentín García.
A deputada do BNG, Ana Pontón apelou ao Regulamento para denunciar que o Plan de dinamización da lingua galega, presentado hoxe polo secretario Xeral de Política Lingüística, Valentín García, non foi remitido con anterioridade ao Parlamento o que impediu o coñecemento dos grupos parlamentarios e furtou o debate na Comisión de Educación e Cultura.
Pontón reiterou a súa petición do documento co fin de celebrar un debate racional e que a comparecencia do secretario Xeral non se convertera nun exercicio de propaganda polo que apelou ao propio Regulamento para xustificar a súa solicitude.
Pola súa parte a presidencia da Mesa, María Soledad Piñeiro considerou que o documento era complementario á comparecencia de Valentín García polo que desestimou a petición da nacionalista.
A política de Feijóo é un novo Prestige para o galego
Tras a comparecencia do Secretario Xeral, a deputada acusou ao Partido popular de cinismo e de non defender a lingua galega, temos unha política, dixo, que dende a chegada de Núñez Feijóo, no aspecto lingüístico, destacou polos permanentes ataques o que, ao seu entender, significa un novo Prestige para o noso país, contaminou e arrasou unha parte da nosa lingua e nos inundou de mentiras e cinismo político.
Sobre a comparecencia dixo que foi anunciada para informar da promoción e dinamización da lingua galega, con especial atención ao ámbito socieconómico, pero resulta ser un Plan que ninguén coñece nin vai contar con orzamento. A ese documento, engadiu, só pode ter acceso o secretario de Política Lingüística, a Real Academia Galega e o Consello da Cultura galega. Se vostede tivera interese en debater ese documento, afirmou, xa nolo tería remitido con anterioridade para permitir que o puideramos debater e non presenciar hoxe outra declaración de amor que unha vez máis, responde á falta de política da Xunta de Galiza e á normalización.
A Xunta muda o termo normalización por dinamización
Sobre esta cuestión, a parlamentaria explicou que a lingua non esta parada senón que o galego vive unha clara situación de discriminación e o que precisamos, recalcou, son políticas de normalización para sacar a nosa lingua do apartheid lingüístico actual.
É unha falta de respecto democrático non remitir de antemán o plan e repetir unha comparecencia que non aporta nin recursos económicos nin obxectivos. Na etapa de Anxo Lorenzo, lembrou produciuse un retroceso no ámbito lexislativo brutal que provocou que se incremente a discriminación e marxinalidade da lingua galega e agora con vostede, o desmantelamento é económico e técnico da normalización lingüística.
Finalmente, a deputada rematou á súa intervención afirmando que o plan presentado hoxe só persegue marearnos durante todo o ano 2015 pero sen ningunha medida práctica nin orzamento.
