A deputada do BNG no Congreso, Rosana Pérez subiu á tribuna do Congreso para manifestar o máis rotundo rexeitamento do BNG á Lei de Seguridade Cidadán, coñecida popularmente como Lei Mordaza.
Unha lei que hoxe supera o seu último trámite co debate no Pleno das emendas procedentes do Senado.
Rosana Pérez acusou ao PP de practicar a ideoloxía máis reaccionaria e represora e vulnerando grande parte dos dereitos e liberdades fundamentais. Para a deputada do BNG as reformas do Código Penal e a Lei Mordaza encamíñanos definitivamente cara un estado policial que ten por obxectivo silenciar e amordazar calquer atisbo de crítica, denuncia ou movilización social.
Reprochou ao Goberno que nos sitúen cada vez máis lonxe dos países avanzados democraticamente e nos levan aos tempos nos que a poboación vivía permanentemente en estado de vixianza e control.
Respostan á crítica social con máis represión
Salientou a importante crítica e oposición a esta lei, non só dos grupos políticos como o BNG senón de moitas organizacións de defensa dos dereitos humanos até organismos internacionais como o Consello de Europa ou a Oficina do Alto Comisionado da ONU para os Dereitos Humanos.
Responsabilizou ao Goberno do malestar social existente debido ás políticas austericidas e anti sociais practicadas que supuxeron o empobrecemento e a exclusión social de millóns de persoas. A responsabilidade desta situación é do Goberno, que levou aos cidadáns a expresar o seu malestar e rexeitamento ás políticas austericidas por medio da protesta social, que na inmensa maiorías das veces é pacífica.
Reprochou ao Executivo que a resposta á crítica social sexa a represión: respostan aumentando a potestade punitiva e sancionadora, ampliando as faculdades das forzas de seguridade e a discrecionalidade policial.
Neste sentido, puxo de manifesto o incremento das actuacións policiais cuestionábeis e das detencións practicadas nos últimos meses que xa deixaron ao descuberto as verdadeiras intencións do Ministro de Interior e do Goberno.
Criticou Rosana Pérez a falla de diálogo e de consenso: Vostedes prepotentemente non deron nin un paso atrás na tramitación desta lei. E advertiu ao PP que aínda que hoxe remata o trámite de aprobación desta lei non remata con elo a protesta nin a movilización cidadá. E dígollo máis claro: mentras sigan gobernando en contra da maioría social non nos calarán.
