Ana Pontón que cualificou o vídeo de sexista tamén preguntou se existe algún estudo que xustifique o retorno económico do vídeo
A parlamentaria do BNG, Ana Pontón defendeu hoxe unha Proposición non de lei na que pedía rescindir o contrato coa produtora do videoclip de Enrique Iglesias.
Tras argumentar o Partido popular que se producirá un importante retorno económico fundamentalmente en turismo, a deputada preguntou onde está o estudo que avale tal aseveración?.Cál é o público que pode ver o vídeo de Enrique Iglesias e con que capacidade adquisitiva?.Non hai ningún estudo, sentenciou.
Na defensa da iniciativa, Pontón afirmou que pagar 300.000 euros ao cantante Enrique Iglesias por un vídeo sexista e que non aporta nada a cultura galega é unha tomadura de pelo a todos os galegos e galegas que cos seus impostos sufragaron a gravación do videoclip.
Pola súa parte, o portavoz do Partido popular, Agustín Baamonde destacou a "polémica", xerada polo vídeo e defendeu a súa difusión augurando que será un éxito rotundo para a promoción turística en Galiza. Baamonde anunciou o voto en contra da iniciativa do BNG por considerar que a rescisión do contrato coa produtora resultaría moito máis caro ao ter que indemnizala.
A deputada replicou que os segundos nos que aparecen as imaxes de Galiza sen música, poden ser suprimidas nun futuro visionado. O 14 de novembro do 2014 foi anunciada a grabación e iniciada e a formalización do contrato no mes de febreiro descoñecendo os termos do contrato polo que reclamou coñecer as condicións do mesmo.
Pontón lembrou que o Consello de Contas cualificou de "despilfarro" 300 millóns de pesetas (1,8 millóns de euros) pagados a Julio Iglesias por aparecer a marca Galicia nos seus concertos, unha situación que hoxe comparou co pago do videoclip do seu fillo.
A deputada cualificou de "escandaloso, vergonzoso e un insulto a todos" os que padeceron recortes no ámbito da cultura pagar 300.000 euros a Enrique Iglesias. O PP, engadiu, somete "a economía de guerra" ao sector cultural mentres subvenciona ao este "millonario de Miami".
A parlamentaria manifestou que o PP está conseguindo que se ridiculice a Galiza fora con actuacións de corrupción na Xunta co seu presidente fotografado cun narcotraficante ou con Gerardo Conde Roa bailando con Mamá Noel.
Pontón reiterou que o problema non son os gustos musicais de cada quen, o problema recalcou, é como se gastan os cartos de todos e tadas nós.
