Montse Prado reclama a publicación do informe que provocou a dimisión dos membros da Comisión Galega de Bioética e que Sanidade asuma as súas conclusións sobre desigualdades na atención sanitaria
A deputada do BNG, Montse Prado rexistrou hoxe, no Parlamento galego, diversas iniciativas sobre a dimisión de sete membros da Comisión de Bioética provocada por diferenzas coa consellería de Sanidade sobre medidas correctivas contra as desigualdades na asistencia sanitaria recollidas nun informe.
A parlamentaria estima que a Consellería debe rectificar e aceptar as conclusións da comisión en materia de asesoramento e orientación polo que reclama a publicación do devandito informe e a aplicación das recomendacións sobre normas e protocolos de actuación que atinxen a cuestións bioéticas.
A nacionalista considera que foron precisamente esas discrepancias as que provocaron a dimisión de sete profesionais da Comisión de Bioética ás que hai que sumar dúas persoas máis no mes de xuño e outra no mes de xullo.
Todo indica, engade Prado que a falta de entendemento entre Comisión e Consellería teñen a ver co funcionamento deste órgano colexiado e a falta de independencia para realizar o seu labor como demostra a negativa de Sanidade para publicar o último informe d@s integrantes da Comisión. Por esta razón, a parlamentaria presenta unha Proposición non de lei que será tratada en pleno pedindo a rectificación da consellería contra a dimisión d@s 9 profesionais e publicar de inmediato o informe elaborado pola Comisión Galega de Bioética sobre Desigualdades na asistencia sanitaria.
Jorquera confirma que o BNG pedirá a dimisión de Rocio Mosquera e explicacións a Feijóo polo acontecido
Por outra parte, o portavoz do Grupo Parlamentario do BNG, Francisco Jorquera, interpelado por esta cuestión na súa comparecencia ante os medios de comunicación tras a Xunta de portavoces, asegurou que o BNG criticou en diversas ocasións a degradación da Sanidade Pública Galega como consecuencia das políticas da titular de Sanidade e anunciou que no debate da Proposición non de lei, o BNG pedirá a dimisión de Rocio Mosquera e explicacións ao presidente da Xunta sobre o acontecido coa Comisión Galega de Bioética.
.
