Madrid, 31 de xaneiro de 2015.- A deputada do BNG no Congreso, Rosana Pérez, presentou unha proposición non de lei na Cámara na que insta ao Ministerio de Educación a non levar a efecto a reforma dos graos universitarios aprobada onte no Consello de Ministros e que supón reducir os graos a tres anos máis dous de máster.
Rosana Pérez levará esta iniciativa a debate e votación nunha vindeira Comisión de Educación que terá lugar o 11 de febreiro.
A deputada do BNG realiza unha severa crítica da rebaixo dos graos universitarios porque vai empiorar a calidade educativa do sistema público universitario, e para máis inri, o Ministerio está encarecendo enormemente a formación na Universidade posto que o custe dun máster é altamente prohibitivo. Recalca Rosana Pérez que xa o modelo actual 4+1, catro anos de graos e un de máster, supón xa unha carga onerosa para as maltreitas economías familiares.
Rosana Pérez critica a Wert porque esta reforma non ten sentido e por riba está cuestionada polo Consello de Estado e polos rectores, ademáis das consecuencias negativas para os petos das familias con fillos na Universidade
Se por riba aumentan a dous anos de máster, poderíamos dicer que o Ministro Wert está expulsando da formación universitaria aos alunos de clases sociais máis desfavorecidas. Co panorama actual, esta decisión só ten dúas leituras: que os estudos universitarios van ser un coto pechado para as familias con máis recursos económicos e instaurar unha educación universitaria elitista.
Universidade para ricos
Para a deputada do BNG voltaremos a tempos pasados nos que só estudaban os fillos dos ricos.
Ademáis, a parlamentar nacionalista pón de manifeto outra cuestión relacionada cos negocios do ámbito privado. O Goberno continúa alimentando ás empresas privadas do sector da educación ao darlles máis posibilidades de negocio con dous anos de máster.
Rosana Pérez empraza a Wert a retroceder nesta idea polas consecuencias negativas que terá para os alunos, para o profesorado, para a calidade educativa e para as economías das familias.
Non ten sentido cando as xeracións do Plan Bolonia se graduaron no 2014
Alega Rosana Pérez que a reforma dos grados universitarios non gosta nin ao Consello de Estado nin aos rectores que manifestaron o seu desacordo. Nese sentido, destaca unha das críticas do Consello de Estado: o sistema do Plan Bolonia, o 4+1, aínda rematou de implantarse de xeito xeralizado en 2010, e as primeiras xeracións graduáronse en 2014. Sen esquecer que aínda non se extinguiu por completo o Plan antigo de licenciatura na maior parte das Universidades.
Polo tanto, conclúe a deputada do BNG, non vén ao caso reformar agora os graos posto que aínda non se puideron avaliar os efectos da adaptación ao Plan Bolonia,.
Asemade, a deputada nacionalista insta ao Ministro a tomar nota das recomendacións do Consello de Estado e a dialogar coa comunidade universitaria e procurar o consenso, unha das recomendacións do Consello de Estado. Pérez critica a Wert porque na recta final da lexislatura, non se lle ocurre outra cousa que dar un paso máis na súa política de destrucción dos sistema educativo público.
