A parlamentaria depositou no escano de Jesús Vázquez unha bandexa cunha peza de froita pasada, un pequeno filete de polo , pan e un mexunxe de baixa calidade semellante ao servido pola empresa de catering, Serunión S.A en comedores escolares
A deputada do BNG, Tereixa Paz denunciou hoxe a privatización dos comedores escolares e a posta en marcha dun sistema de catering denunciado nos últimos tempos por nais e país ante a ínfima calidade e cantidade dos alimentos e malas condicións no transporte.
No transcurso da súa intervención, a deputada amosou unha bandexa, que posteriormente depositou no escano do conselleiro de Educación, Jesús Vázquez moi semellante a que serve o servizo de catering da empresa Serunión, S.A. composta por unha peza de froita murcha, un anaco de pan, un filete de polo e un mexunxe de baixa calidade.
Bandexas con alimentos de baixa calidade e pouca cantidade a 4,5 euros
A nacionalista manifestou que nos últimos tempos producíronse numerosas queixas de pais e nais contra o servizo de comedor do IES Celso Emilio Ferreiro de Celanova, tanto en relación coa calidade da comida como nas condicións da presentación, queixas que estendeu a outros centros educativos galegos.
As queixas da comunidade educativa, dixo, céntranse sobre o material empregado pola empresa concesionaria, bandexas onde se depositan os alimentos en estado pouco hixiénico así como falta de condicións hixiénico-sanitarias no transporte da comida.
A deputada afirmou que o estado da furgoneta que transporta os alimentos non é o dun vehículo isotérmico, máis ben parece dedicado a trasladar cans de caza.
Ademais, diso preocupación pola elaboración dos menús escasos e pouco elaborados tanto nutricionalmente como na presentación, e no caso de alimentos frescos son cuestionábeis como demostrou amosando dende a tribuna diversas fotografías.
Un menú miserento a prezo de luxo
Por outro lado, resulta inadmisíbel, que a teor da normativa aprobada polo Goberno Galego en relación co repago dos comedores escolares, haxa familias que teñan que aboar 4,5 diarios por un menú servido composto por cinco croquetas, un anaco de pan, unha sopa, e unha peza de froita, en condicións lamentábeis. Un menú miserento a prezo de luxo que deben aboar as familias.
A alarma, explicou a deputada, non fixo máis que incrementarse cando a comunidade educativa coñeceu que esta empresa é investigada pola Comunidade de Castela-León por atoparse na sopa dun menú escolar larvas brancas de gurgullo dun centímetro de lonxitude.
Finalmente, a nacionalista considerou que a gravidade da situación require a rescisión inmediata do contrato.
O PP abre expediente a empresa pero non rescinde o contrato.
Pola súa parte, o portavoz do PP, Rodríguez Román acusou á deputada de tentar politizar a cuestión e informou da apertura dun expediente á empresa ao que a nacionalista replicou que non era suficiente porque estaba en risco a saúde do alumnado e reclamou a suspensión cautelar do contrato ate o remate do proceso. Si quixera politizar este tema, contestou Paz, ao mellor teríamos que comprobar se as persoas que elaboran as comidas contan co carné de manipulador/a.