A deputada Ana Pontón preguntou o Goberno cando vai cumprir as medidas e obxectivos do Plan xeral de Normalización da Lingua galega
Pleno.- A deputada do BNG, Ana Pontón formulou hoxe unha pregunta ao Goberno sobre o cumprimento das medidas e obxectivos establecidos no Plan Xeral de Normalización da Lingua galega.
A parlamentaria lamentou que tras dez anos da aprobación histórica no Parlamento galego do Plan de Normalización da Lingua galega, documento con máis de 200 páxinas e 445 medidas, a lingua galega sega marxinada e esmorecendo.
Sabemos, dixo, que o galego non está en igualdade nin legal nin socialmente, e a igualdade é un principio básico para a liberdade. A discriminación do galego, afirmou, é un feito obxectivo, só hai que intentar vivir en galego durante todo un día para poder constatalo.
Pasamos do 13% de persoas que vivían en Galiza que non falaban nunca en galego a un 25, 8% e pasou de ser a lingua inicial do 60% da poboación galega o 20,6%, polo tanto, en pouco máis dunha década, tivo unha caída de 40 puntos.
Os últimos datos sobre a evolución do galego, explicou a deputada, reflicten que deixa de ser a lingua de uso maioritario da poboación, datos que nos alertan denunciou e que demostran o difícil futuro da lingua galega.
A deputada reprochou ao conselleiro de Educación e Cultura as mentiras que sistematicamente reitera na Cámara galega sobre o saúde do idioma galego e o proceso de substitución onde o galego leva as de perder, vostedes, deliberadamente, están levando adiante esa política.
A evolución da lingua galega non é normal, natural e moito menos desexábel e no noso país hai unha política que marxina o noso idioma. A Xunta, é un veleno para a lingua galega. Nós, seguimos defendendo o Plan xeral de Normalización Lingüística e por iso preguntamos que van facer vostedes para aplicalo, conclúiu.
