A portavoz do BNG na Eurocámara, Ana Miranda, cualifica de irresponsabilidade política, lamentablemente xa con moitos precedentes que o goberno da Xunta non tivese enviado ningunha alegación á Comisión Europea no trámite de consultas aberto polo Executivo comunitario entre marzo e setembro de 2013 sobre a súa proposta normativa de prohibir calquera tipo de rede a deriva a partir de xaneiro de 2015.
Unha vez máis o Goberno da Xunta estivo totalmente ausente na defensa do sector pesqueiro galego en Bruxelas, como acaba de confirmar o Executivo da Unión Europea na Comisión de Pesca da Eurocámara. Ningún goberno, nin o español, nin o galego, enviaron alegacións solicitando a exclusión do xeito da prohibición das redes a deriva a partir de xaneiro de 2015, denuncia Miranda. Conclusión deste desleixo: 427 embarcacións, das que viven directamente máis de mil familias, poden desaparecer dun plumazo en menos de tres meses.
Miranda, que asistiu ao debate na Comisión de Pesca considera que a proposta é unha verdadeira provocación, formulada desde a total ignorancia do que é a arte do xeito e do que representa para a economía en moitas partes de Galiza, en particular na Ría de Arousa, Pontevedra ou Vigo.
Unha ignorancia da realidade do país que a Xunta non fixo nada por corrixir, cando tiña que ter informado, xa hai un ano, á Comisión Europea sobre a existencia do xeito e o impacto dunha medida horizontal prohibitiva semellante á que pretende aprobar o executivo da UE, alegou.
Enlace para consultar as alegacións presentadas, sen que exista ningunha do Goberno galego: http://ec.europa.eu/dgs/maritimeaffairs_fisheries/consultations/driftnet/contributions/index_en.htm
Apoios ao xeito na Eurocámara
O BNG prosegue cos seus contactos políticos na Eurocámara para sacar á pesca artesanal do xeito da prohibición que quere implantar a partir de xaneiro de 2015. Neste sentido, Miranda xa mantivo sendas reunións coa ponente do Parlamento Europeo para este tema, a italiana Renata Briano, que está totalmente a favor de apoiar ao xeito, por tratarse dun arte de pesca artesanal, e co propio presidente da Comisión de Pesca da Eurocámara, o bretón Alain Cadec, quen transmitiu tamén o apoio ao sector do xeito galego porque considera que a proposta da Comisión non está fundamentada nin analizou o impacto económico dunha medida semellante", explica Miranda.