O Goberno da Xunta xustificou o incremento do 34% no canon de Sogama para compensar as perdas de 4 millóns de euros da empresa, números roxos que finalmente quedaron reducidos a 600.000 , o que leva aos alcaldes e alcaldesas do Bloque a solicitar a inmediata retirada do taxazo e a devolución dun diñeiro roubado en base a unha contabilidade falsa.
As contas de Sogama son falsas, unha mentira, denunciou o alcalde de Monforte, Severino Rodríguez, quen se equivoca nun 85% na previsión orzamentaria ou é un incapaz ou minte, argumentou, pero o que non pode ser e que se engane a xente e non pase nada, que se falsifiquen as contas e non pase nada.
En consecuencia, os rexedores nacionalistas piden a retirada inmediata do incremento do canon e a devolución do diñeiro roubado ilegalmente aos veciños e veciñas, que cifran en 80.000 euros anuais de sobrecuste por cada 10.000 habitantes. A modo de exemplo, o taxazo supón para Monforte un incremento de 150.000 euros na factura de recollida de lixo, 260.000 euros para Carballo ou 80.000 euros para Ribadeo.
Cando alguén ten a razón hai que darlla, recalcou Rodríguez, quen desestimou calquera alternativa que non sexa a retirada do taxazo. Revisar que? O que teñen que facer é devolver o diñeiro, que é dos cidadáns e dos concellos non da Xunta.
Neste sentido, o BNG xa ten solicitado a reunión urxente da Comisión de Residuos da FEGAMP, que ten que actuar con contundencia en defensa dos concellos en lugar de seguir o paso que lle marcan desde a Xunta.
Os rexedores nacionalistas non descartan a vía xudicial para acadar un dobre obxectivo: retirada do taxazo e devolución dun sobreprezo xustificado nunha contabilidade falsa. O señor Feijóo debería contestar que opinión lle merece unha empresa que fai unha previsión na que se equivoca nun 85%, interpelou o alcalde monfortino, quen asegurou que seguirán chamando a porta, aínda que Feijóo se empeñe en pechala.
O BNG volverá a levar este asunto ao Parlamento para esixir responsabilidades políticas. Pedimos o cese do presidente de Sogama pola súa actuación neglixente e falsaria, que agocha a intención de facer caixa a costa dos concellos e da cidadanía, denunciou a deputada nacionalista, Ana Pontón.
Pontón insistiu en que se trata dun modelo fracasado e insostible desde o punto de vista económico e ambiental, e subliñou que os concellos gobernados polo BNG están traballando en modelos alternativos como xa fixo Rianxo, abandonando Sogama para ir a planta de reciclaxe de Lausame, ou Allariz que vai pór en marcha un sistema de recollida de lixo porta a porta.
Na comparecencia de prensa estiveron presentes os alcaldes de Ribadeo, Fernando Suárez, San Sadurniño, Secundino García, Monforte, Severino Rodríguez, e Carballo, Evencio Ferrero, así como a deputada Ana Pontón e a secretaria de Política Municipal, Goretti Sanmartin.