Carme Adán pide ao Goberno de Feijoo medidas reais e eficaces para previr os asasinatos de mulleres
Ante o novo asasinato machista rexistrado en Galiza nas últimas horas, o BNG condena a pasividade das administración e reclama solucións reais contra a violencia que padecen as mulleres.
A portavoz do BNG de Política de Igualdade, Carme Adán, afirma que non chega con lamentar os asasinatos machistas como habitualmente fai o Partido popular. O Goberno de Feijóo debe desenvolver a lei galega dotándoa de orzamentos, programas e recursos como recolle o propio texto.
A parlamentaria critica os recortes que o Goberno Feijóo realizou en todas as partidas orzamentarias para igualdade e asegura que desde que é Presidente, as partidas destinadas á políticas de Igualdade sufriron un recorte maior ao 50% e eliminou programas para a prevención da violencia de xénero.
Para a deputada, a violencia machista é expresión da desigualdade entre homes e mulleres e as decisións do Partido popular, nesta materia, representan o seu desprezo polas políticas de Igualdade. Adán destaca entre esas medidas o apoio do PP a colexios que segregan as nenas e o impulso da reforma da lei do aborto, isto, recalca a nacionalista, son claros retrocesos nos dereitos das mulleres.