A portavoz do BNG no Congreso, Olaia Fernández Davila, solicitou hoxe a comparecencia do Ministro de Facenda e Administracións Públicas, Cristóbal Montoro, para que aclare se o Goberno ten intención de aprobar un novo catálogo de recortes.
Davila quer que o titular de Facenda aclare en sede parlamentar se o documento elaborado polo Ministerio que contén 255 medidas de racionalización do gasto, e que desvelan duros recortes en eidos de grande importanza social, vanse efectivizar.
Olaia Fernández Davila amosa a preocupación do BNG por un documento que se vai levar ao vindeiro Consello de Política Fiscal e que exixiría ás CC.AA severos recortes en ámbitos da súa competencias como o sanitario, o educativo, ou o económico-laboral.
Unha sociedade empobrecida non pode soportar máis recortes
Propostas como o copago sanitario por non asistir a citas médicas programadas ou o copago por ir a urxencias ou simplesmente por ir a unha consulta médica, causan verdadeira alarma social e política, sinala Davila, quen considera que xa tivemos suficiente doses de recortes deste Goberno de maioría absoluta que goberna a golpe de Reais Decretos, e desde logo, unha sociedade cada vez máis empobrecida non pode soster nin aguantar un novo catálogo como o que se augura no documento de Facenda.
A deputada do BNG advirte ao Goberno de Rajoy que o que menos precisa unha poboación xa moi castigada e que vive cada vez nunha precariedade maior, son máis recortes. Ademáis, lembra que de se levaren a cabo, estaríamos ante o enésimo incumprimento de promesas por parte do PP, porque o propio Montoro e tamén Rajoy afirmaron que non habería máis axustes como os vividos.
Davila insta ao Goberno a camiñar na dirección contraria, a deixar de someter a duros sacrificios á sociedade en xeral, e a afortalar os servizos públicos, en lugar de privatizalos e precarizalos.