A deputada do BNG no Congreso, Rosana Pérez, afirmou hoxe após da xunta de portavoces que mañá o PP e o PSOE van consumar o xa pactado e furtar o debate aos grupos políticos e á cidadanía, en referencia ao breve debate sobre a lei orgánica de abdicación do Rei Juan Carlos en procedemento de leitura única.
A deputada do BNG censurou as presas do bipartidismo cun procedemento de urxencia acordado por PP e PSOE. Para Rosana Pérez era o momento idóneo de abrir un debate en profundidade a toda á sociedade.
Nese sentido, explicou que o BNG presentou unha emenda á totalidade con texto alternativo que plantexa a celebración dun referendo no prazo dun mes após a aprobación da lei orgánica, e enfatizou a necesidade de abordar un novo modelo de estado que debería contemplar o recoñecemento da soberanía das nacións e do dereito a decidir.
Por coherencia, o BNG non estará no acto de proclamación o 19
Para o BNG é o momento porque os procesos están moi avanzados en territorios como Catalunya e o País Vasco, e en Galiza, puntualizou, o BNG está a realizar un labor pedagóxico para explicar á cidadanía os beneficios que reportaría ter capacidade plena de decisión. Reprochou ao Goberno do PP que mire de novo para outro lado, e fagan un pacto como o que fixeron no 78.
Anunciou que o BNG non estará presente no acto de proclamación do príncipe Felipe como Rei o vindeiro 19 de xuño: o BNG non estará por coherencia coas nosas posicións e coas propostas que facemos na emenda que defenderá mañá a portavoz do BNG, Olaia Fernández Davila, no pleno.
En canto ás decisións da xunta de portavoces, Rosana Pérez criticou que por segunda semana se altere a orde do día da Cámara e decidan non celebrar pleno. Engadiu que o BNG fixo chegar a súa queixa á Mesa da Cámara por eliminar o pleno e a sesión de control. E no que atinxe ao procedemento da sesión de mañá mércores, denunciou que a Mesa do Congreso decidira tramitar todas as emendas presentadas como emendas de devolución cando formacións como o BNG presentaron unha emenda á totalidade con texto alternativo.