Ana Pontón: É escandaloso que a Xunta salve á Banca e as empresas con cartos públicos e non aos desempregad@s e desafiuzad@s
A través dunha pregunta parlamentaria, na comisión de Ordenación do Territorio, sobre o pacto económico da Xunta coas empresas adxudicatarias das autovías ante unha posible quebra, a deputada do BNG, Ana Pontón cualificou de fraude á cidadanía a intención da Xunta de Galiza de compensar economicamente ás empresas e criticou que existan fondos públicos para rescatar as autovías e á Banca e non para as persoas desempregadas e desafiuzadas.
En resposta ao BNG, a directora da Axencia Galega de Infraestruturas, Ethel Vázquez asegurou que a Xunta está a estudar a maneira menos gravosa de compensar ás adxudicatarias das autovías do Barbanza e Salnés ante a diminución de tráficos e por atoparse a piques do inicio do concurso de acredores.
As empresas nas que traballou o conselleiro de Infraestruturas
A nacionalista afirmou que non cre nas casualidades e menos cando as empresas beneficiadas polo Partido popular aparecen citadas na trama Gürtel ou como Puentes y Calzadas que deron traballo ao propio conselleiro de Medio Ambiente, Territorio e Infraestruturas, Agustín Hernández.
Ana Pontón reiterou que as concesionarias da administración son as únicas empresas que teñen garantidos os beneficios dos que tamén, na súa opinión, se aproveitan certos dirixentes políticos a través das portas xiratorias para acceder ás grandes compañías.
Informes falsificados e corruptelas para gañar os concursos
Tras a afirmacións de Ethel Vázquez sobre a previsión de que a corto prazo as concesionarias entren en concursos de acredores, a parlamentaria reclamou paralizar a axuda económica da Xunta e botou man do informe do Consello de Contas que alude ao risco que debe asumir a concesionaria ante o mal comportamento do tráfico sen dereito a reclamar á administración.
Neste sentido, a deputada insistiu en que as previsión do tráfico nos contratos poden estar falsificadas para acceder ás contratacións e acusou ao PP de practicar corruptelas neste extremo.