Carme Adán formulou unha pregunta parlamentaria sobre as medidas de amparo do Goberno aos concellos afectados polo cobro indebido da tarifa eléctrica
A deputada do BNG, Carme Adán formulou hoxe unha pregunta parlamentaria na Comisión de Industria relativa a existencia de facturas duplicadas e irregularidades no cobro indebido da tarifa eléctrica en numerosos concellos galegos.
Pola súa parte, a directora xeral de Comercio, Sol Vázquez recoñeceu o fraude na facturación e anunciou que os cobros indebidos aos concellos serán levados a través da lei de Consumo para a pertinente devolución das cantidades.
Adán lembrou que o BNG presentou unha moción nos concellos galegos sobre as numerosas reclamacións pola facturación indebida da electricidade ao aplicar a distribuidora eléctrica unha tarifa diúrna cando as institucións contrataran a nocturna para o alumeado público, asemade denunciou a duplicidade de facturas, a ausencia de contadores, o cobro de tramos equivocados e conceptos contrarios á lexislación eléctrica.
Para a deputada, máis alá dos erros puntuais, a distribuidora eléctrica cometeu unha estafa que agora, seguindo as afirmacións da titular de comercio, dixo, será resolta coa devolución dos cobros indebidos .
Adán amosou a súa satisfacción polo anuncio de que a Xunta inicie a apertura de expedientes sancionadores tras as reclamacións en curso formuladas polos concellos galegos, cinco anos de facturas indebidas, dixo, parécenos escandaloso polas graves consecuencias para as arcas locais.
A Xunta iniciará os expedientes sancionadores
Sol Vázquez confirmou que o Inega e Instituto Galego de Consumo puxo en marcha unha campaña de información aos consumidores para explicar os distintos contidos da factura eléctrica e sobre as reclamacións dos concellos, afirmou que a Xunta adoptou unha posición activa poñendo en marcha diversas medidas como o asesoramento e colaboración para mediar e resolver a reclamación.
A titular de Comercio aclarou que nos últimos cinco anos foron cobradas aos concellos cantidades prohibidas polo Real decreto polo que a compañía comercializadora iniciou un proceso de devolución dun ano pero para o Instituto galego de consumo, os concellos son consumidores e a normativa de consumo contempla que as infraccións prescriban aos cinco anos, polo tanto facúltanos para iniciar os expedientes sancionadores para a devolución das cantidades cobradas indebidamente durante ese período.
