A portavoz do BNG no Congreso, Olaia Fernández Davila, explicou hoxe en rolda de prensa que o BNG solicitou esta mañá a convocatoria dunha Deputación Permanente para que comparezan conxuntamente os Ministros de Economía, de Facenda e de Industria pola situación suscitada a raiz de se coñecer onte a resolución do expediente sobre o anterior Tax Lease.
Para a portavoz do BNG no Congreso a decisión que coñecemos onte demostra que é unha decisión política da UE, que se tiña que ter tratado desde posicionamentos políticos, como sempre demandou o BNG. Neste sentido, lembrou as reiteradas solicitudes do BNG, tanto a Rajoy como a Feijoó, para que emprendesen actuacións políticas diante das autoridades europeas e os estados membros da UE.
Criticou a pasividade gubernamental porque durante este tempo nada fixo o Goberno do estado para salvar ao naval, para que fose competitivo. A deputada do BNG pediu axilidade ao Executivo para que se aborde a situación canto antes. Por iso, solicitamos a comparecencia de tres Ministros con responsabilidades na cuestión porque deben explicar que vai facer o Goberno a partir de agora porque precisamos respostas urxentes, non dentro duns meses.
Davila fixo un recoñecemento do labor da eurodeputada do BNG, Ana Miranda, en relación a este tema e puxo de manifesto que continuará a traballar en Bruxelas como no día de hoxe. Resaltou as xuntas promovidas por Ana Miranda co Comisario Almunia, e subliñou que nengún eurodeputado do PP se entrevistou do Comisario da Competencia.
Davila instou ao Goberno e á Xunta a asumir políticas activas no financiamento do sector naval, igual que están a facer outros países da UE, impulsando créditos a baixo xuro. Non é posíbel que en Alemaña os xuros para o financiamento do naval estean ao 4%, mentras aquí están ao 12%. Unha situación que nos coloca case nun nivel de competencia desleal. Así propuxo que o Goberno active créditos a baixo xuro através do ICO ou dos bancos nacionalizados como NCG.
Rajoy e Feijoó responsábeis
Pola súa parte, a voceira municipal do BNG no concello de Vigo, Iolanda Veloso, subliñou o efecto negativo da medida adoptada pola UE, un golpe máis para unha cidade cunha situación de crise económica dramática e altas cifras de paro. E amosou a preocupación do BNG polas consecuencias da decisióne lembrou a defensa a ultranza do sector naval no concello de Vigo con accións conxuntas entre todas as forzas políticas e entidades sociais.
Afirmou que o problema do naval vai máis alá de declarar persoa non grata a Almunia como propón o alcalde. Almunia xa é persoa non grata, pero se diso se trata tamén deberíamos declarar persoas non gratas a Feijoó e a Rajoy, que non defenderon ben ao sector. Engadiu que desde o concello de Vigo seguiremos reclamando medidas para o desenvolvemento do naval e para o mantemento dos postos de traballo, xa que o que ocorra co naval ten consecuencias económicas noutros sectores da cidade.
A deputada do BNG no Parlamento galego, Carme Adán, tildou de decisión inxusta a adoptada pola UE sobre o noso naval, e outra vez nos topamos cun Presidente da Xunta que en lugar de pór solucións enriba da mesa, segue a exercer de tertuliano e opinador de noticias.
Cando chegou Núñez Feijoó á Xunta de Galiza, o sector naval galego era o primeiro do estado, neste momento, o sector galego está no posto número tres. Preguntámonos como é posíbel que o sector naval do País Vasco gañase pedidos, e que as gradas dos esteleiros galegos estean valdeiras, e non podemos evitar comparar a inacción do Goberno galego coa acción doutros gobernos autonómicos.
Reprochou a Feijoó que non mova un dedo por converter Novagaliciabanco nun banco público galego, que sería un válido instrumento para financiar o sector naval. Censurou á Xunta porque ante esta situación nada sabemos dos plans do goberno galego para que o sector naval galego non desapareza, non sabemos que plans e estratexias van pór en marcha, nen que van facer desde a Consellería de Industria e desde o IGAPE, que podería ser un instrumento para facilitar o crédito para as empresas do sector.
Anunciou que o BNG solicitará a convocatoria dun Pleno estraordinario do Parlamento galego para abordar en profundidade este grave problema.
Doutra banda, o responsábel comarcal de Vigo, Manuel Caride, puxo de manifesto que a situación crítica do sector naval na Ría de Vigo non é froito da casualidade, é consecuencia da nefasta xestión da Xunta e do Goberno central. Criticou a falla de iniciativa tanto dunha Administración como da outra para impulsar un sector estratéxico.
Caride sinalou que o Goberno español ten que buscar solucións para o sector, e plantarlle cara a unha UE que está destruindo un sector produtivo importante, e engadiu que o BNG non abandonará ao sector naval, segueremos a traballar tanto na rúa como nas institucións.