A deputada do BNG, Montse Prado defendeu unha Proposición non de lei instando ao Goberno galego a dirixirse ao Goberno español para manifestar a súa enérxica oposición contra o recorte de 150 millóns de euros en Sanidade, incluídos no informe enviado á Unión Europea
A parlamentaria do BNG, Montse Prado denunciou hoxe, na comisión de Sanidade, o novo recorte de 150 millóns de euros incluídos no informe enviado polo Estado español á Unión europea que se sumarán aos 5.427 millóns xa recortados no conxunto das Comunidades Autónomas.
A parlamentaria instou a Xunta a exercer o autogoberno e imporse ao Goberno central contra o recorte de 150 millóns de euros no 2014 na partida da asistencia sanitaria contemplado no informe enviado a Unión europea.
A medida é ideolóxica, non obedece á falta de recursos
Por moito que o queiran disfrazar, dixo, esta medida terá consecuencias nefastas para a poboación e denunciou que obedece a un criterio ideolóxico, non economicista.
Neste sentido, explicou que os recortes en sanidade non se deben a falta de recursos económicos cando foron inxectados á banca 240.000 millóns de euros, 12.000 por contribuínte e as autoestradas en quebra lle será aplicada unha quita do 50% deixando o rescate en 2.500 millóns.
A deputada reiterou que a escusa da crise económica para seguir recortando en servizos públicos xa non convence a ninguén, vostedes, dixo, seguen chuchando nos de abaixo, nos colectivos máis vulnerábeis, nos pensionistas e traballador@s que sofren cruelmente as consecuencias dos copagos e de exclusión de máis de 400 fármacos do catálogo de prestacións farmacéuticas.
O Partido popular agora, manifestou, volve a mostrar a súa face máis cruel cun novo recorte de 150 millóns de euros na sanidade pública polo que volveu reclamar que a Xunta exerza de Goberno galego e plante cara a Mariano Rajoy opoñéndose ao recorte.
A Proposición non de lei nacionalista foi rexeitada polo grupo maioritario do Partido popular.
O BNG pide o reagrupamento de pres@s e que o Sergas asuma a súa atención sanitaria
Por outra parte, o PP tamén impediu que prosperara outra iniciativa defendida pola nacionalista Montse Prado, na mesma comisión, relativa a iniciar actuacións para que o Sergas asuma a atención primaria nos centros penitenciarios así como o cumprimento de condenas en Galiza.
Na súa intervención defendeu que a poboación reclusa conte con atención sanitaria adecuada polo que pediu que sexa cumprida a lei de Cohesión e Calidade para a integración dos servizos sanitarios dependentes de Institucións Penitenciarias nos Sistemas Nacionais de Saúde.
A estas alturas, e despois de 11 anos de entrar en vigor a Lei, sigue sen cumprirse polo que dende o BNG reclamamos que a poboación interna dependa da sanidade pública e non de institucións penitenciarías, non deben depender das mesmas persoas que se encargan da súa vixilancia, afirmou.
O goberno español,en resposta a preguntas do BNG no Congreso afirmou que as transferencias serán efectivas cando sexan solicitadas polas Comunidades autónomas despois de ser aprobada a Lei, nós hoxe demandámolo aquí en beneficio da poboación reclusa para mellorar a calidade dos reclus@s con VIH, Hepatite, efermidades infecciosas e mentais.
A parlamentaria nacionalista concluíu a súa intervención reclamando o agrupamento de pres@s en centros penitenciarios galegos.
