A portavoz nacional do Bloque Nacionalista Galego, Ana Pontón, na súa visita á Rapa das Bestas de Sabucedo, calificou de “insuficiente” a proposta inicial da Consellería é de “pouca contundencia e amosa un interese lixeiro por conservar e protexer os lugares” onde teñen o seu hábitat os cabalos de monte.
“Precisamos que se concrete de xeito explícito a delimitación espacial que entraría dentro da protección do Ben de Interese Cultural” e sinala que se deben clarificar “as medidas concretas de protección fronte as agresións que se levarán a cabo na zona”.
“Evidentemente hai outro tipo de intereses” subliñou Pontón, que fai fincapé na intención do Partido Popular por tramitar parques eólicos neste lugar. “Está claro que a conservación dos cabalos e do monte para o PP é algo secundario, mais dende o BNG seguiremos loitando para que se defina de xeito claro a protección deste espazo, das bestas e por suposto da Rapa das Bestas”.
Agradecemento á Asociación da Rapa das Bestas de Sabucedo, a responsable do coidado permanente das bestas de Sabucedo, en especial das pertencentes á cabana do Santo, e promoción da celebración anual Rapa das Bestas, como celebración histórico/cultural que vén a ser a manifestación da relación de convivencia coas bestas durante todo o ano.
Pontón puxo en valor a figura do cabalo salvaxe “como o gran herbívoro mellor adaptado ao aproveitamento de breixeiras e turbeiras”, dous dos hábitats con maior interese pola súa biodiversidade en Galiza. A través da dieta, o cabalo salvaxe limita o desenvolvemento da vexetación e favorece que sobrevivan especies de plantas sensibles. “Cambios no manexo dos cabalos salvaxes que limiten o seu comportamento natural poden provocar un efecto negativo e irreversible na biodiversidade” sinalou.
O BNG presentará alegacións á incoación do expediente do BIC e volverá a presentar iniciativas no Parlamento “solicitando unha protección efectiva dos montes”.
